Дастгирии МТМУ дар ВМКБ дар доираи лоиҳаи "Мактабҳои 2030"

Беҳтар намудани сифати таҳсилот бо мақсади даст ёфтан ба дастовардҳои сатҳи ҷаҳонӣ яке аз ҳадафҳои асосии маорифи кишвар ба ҳисоб меравад. Барои расидан ба ин ҳадаф Вазорати маориф ва илми Ҷумҳурии Тоҷикистон бо тамоми зерсохторҳояш нақша ва барномаҳои зиёдро таҳия намуда, қадам ба қадам амалӣ карда истодааст. Сиёсати дарҳои кушод ва роҳандозии ҳамкориҳои судманд, ки аз тарафи Ҳукумати Ҷумҳурии Тоҷикистон ва махсусан Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон амалӣ шуда истодааст, дар ин росто бараъло мушоҳида мегардад. Яке аз ин шарикони ҳамкор лоиҳаи "Мактабҳои 2030" - и Фонди Тоҷикистонии Оғохон ба ҳисоб меравад, ки фаъолияти он дар ҳамкорӣ бо Вазорати маориф ва илми Ҷумҳурии Тоҷикистон, Донишкадаи ҷумҳуриявии такмили ихтисос ва бозомӯзии кормандони соҳаи маориф ва филиалҳои он ба роҳ монда шудааст. Ҳадафи асосии лоиҳаи "Мактабҳои 2030", ки дар сатҳи глобалӣ дар 10 давлати ҷаҳон фаъолият намуда, 100 адад муассисаи таълимиро дар Ҷумҳурии Тоҷикистон зери пӯшиши худ қарор додааст, ба дастгирии лоиҳаҳои хурди аз ҷониби муассисаҳои таҳсилоти умумии озмоишӣ вобаста ба ниёзи омӯзгорон ва бо маводи таълимӣ - методӣ ва таҷҳизоту айёниятҳо муҷаҳҳаз намудани онҳо нигаронида шудааст.Дар ВМКБ дар доираи фаъолияти ин лоиҳа 30 муассисаи таълимӣ шомил буда, соли хониши 2021- 2022 аз ҷониби 90 нафар омӯзгорони ин муассисаҳо лоиҳаҳои хурд- хурди ба рушди натиҷаҳои ҳамаҷонибаи омӯзиши хонандагон нигаронидашуда таҳия ва коркард шуданд. Барои амалишавии ин лоиҳаҳо, тамоми маводу лавозимоти таълимию аёнӣ аз тарафи Лоиҳа харидорӣ карда шуд.Ҳамин тавр дар доираи татбиқи Лоиҳаи "Мактабҳои 2030" санаи 21.10.2022 дар бинои Раёсати маорифи Вилояти Мухтори Кӯҳистони Бадахшон ба 30 муассисаи таълимии озмоишии шаҳру ноҳияҳои ВМКБ беш аз 250 номгӯйи маводҳо, ба монанди компютер, тахтаи электронӣ, принтер, компютерҳои дастӣ, телевизор, воситаҳои тақвияти садо ва овоз, маводҳо барои ташкили дарсҳо бо усули фаъол ва ҳамфаъол, планшет, китобҳои иловагии фаннӣ ва бадеӣ, плакатҳо, таблитса, донишномаҳо ва дигар маводи таълимӣ дастрас карда шуданд. Дар маросими супоридани мавод Президенти Академияи таҳсилоти Тоҷикистон- Саломиён Муҳаммаддовуд, Сардори раёсати маорифи ВМКБ Мирзоқандов Аминҷон, директори филиали донишкада дар ВМКБ- Азизбеков Раҳимдод, роҳбари бахши маорифи Фонди Тоҷикистонии Оғохон -Шералӣ Саидошуров ва намояндагони Донишкадаи ҷумҳуриявии такмили ихтисос ва бозомӯзии кормандони соҳаи маориф иштирок намуданд. Ба таври расмӣ ин маводҳо ба 4 -адад муассисаҳои таълимии шаҳри Хоруғ бо иштироки бевоситаи директорони муассисаҳои таълимӣ ва мудирони шуъбаҳои маорифи шаҳри Хоруғ ва ноҳияи Шуғнон тақдим карда шуд. Тақсими маводҳои таълимӣ дар дигар шаҳру ноҳияҳои ВМКБ идома дорад.